قـَسَمْ العِراقْ

يبقى البيت واحد واحنه بيه خـــــــــوان
بيت اهلي واعرفه وعندي تشريعــه

امس جسر الايمه والبطل عثـــــــــمان
علنوهه بصراحه الوطن ما نبيـــعـه

ومد ايده المعظم شال نص بغــــــــــداد
ونص شاله الجواد وواجب انطيــــعه

وانطبكن سويه وخضرن محــــــــراب
وصلينه الجماعة السنه والــــــشيعه


وحك حنة الفاو وجف يتيمه ينـــــــوح
وحك دمعة الحلة ودم المسيـــــــــب

وحك نخل السماوة المالبسها عثـــــــوك
من طاحت حلبجه ليومك معــــصب

وحك بيرغ عمامي وغترة الطيـــــــبين
وجرغد كل شريفه على الجـسر جلب

ما خايف علــــــــــــــيه مـــارت هواي
شفت الروج عالي وخفت عالمركب


العراقي يذوب من يســـــــمع اسم بغداد
شلون تنام عين وهي محــــــروكه

هاي الطاهرة وأم الـشـــــــرف والدين
سر بكلب كل عاشك نغز شـــــوكه

شيلته يسر جانت للمعــــــــــــــــسرات
ولمن عسرت صبحت مبيـــــــــوكه

خلي نشيل سيف ونكص جف الخـــوف
ونذبحها الطغاة الطمعت بــــــســوكه

ونشيل الوكع رغما على الاحـــــــــقاد
ونبنيه الوطن طابوكه طــــــــابوكه

ونشيل العلم جلمات يصـــــــبن غيض
ودم اخضر نزف من باكوا حـكوكه

بعد كل لملك كــــــــــش ملك خله يهيد
تره برخين احصره وجندي يـسوكه

خل نحط أيد بايد ونروي هاي الكـــــاع
مو نشفت لهاة الوطن وعـــــــروكه

تره العباس وحده وهز فيافي الكــــون
وروى الدنيا بكبرها بجربه مشـــكوكه

جم دوب العطش واحنه بجرف نهرين
وما مدينه ايدينه ونكدر انضوكـــــه

طبع بدوي العراقي من يشح المـــــاي
خده يصير واحه يسد عطش نوكــه


يستاهل وطنه شما طلب ننطيـــــــــــه
لئن عز وكرامه وشرف غطانـــــي

تعال انزيحها ياخـــــــــــوي انا ويــاك
غيمه من الحزن غركــــــت كيعاني

كبل يشهد الي مـكواري هز الكــــون
وبلفاله وابوخزامة هزمت عدواني

اذا طاح بصــلاح الدين اخــوي اليوم
انا ويه البصرة اهد ما حاجه ينخاني

واذا حشم الموصــــــــل وينـكم يولاد
من ذي قار يفزع زود عــــــــدناني

والكوت وهله وكاعه ام الخــــــــــــــير
وكل اهل الفرات بزود شـــــعلاني

نصيح بصوت عالي وخلهم يســمعون
الغربه الطبوا وذبـــــــــــحوا اخواني

كبلكم دول رادت تاخذ البستـــــــــــان
عيوني اشلعت وما عفت بســــــــتاني

شكرا يا سومري

يسلموووووووووو وربي موضوع جميل

شكرا يا مبدع

تقبل مروري