اتمنه ياموطني ...

على اعناد السيد المدير العام اللي قافل باب المشاركة بالشعر الشعبي بس للمديرين
قررت بعد الاتكال على الله ان انشر هاتين القصيدتين من الشعر الشعبي في باب العمارة لان الشعر عبارة عن بيوت وبيت فوك بيت فوك بيت يسوي عمارة

وهذه العمارة (عفوا... القصيدة) الاولى:

اتمنه ياموطني ...

اتمنه ياموطني ...
ترجع مثل ما جنت
حنه وصواني و شمع ..
وعيون من تنفتح .
تعصر فرحها ندى
و تشرب سحاب الدمع ..
واتمنه...
اشوف الصبح ...
بيه تنرسم صورتك ..
ورده اعله شفة نبع ...
يا خذ عطرهه الهوا ...
وايدك شذاها دوا ..
يم كل كََــلب منفجع ..
***

اتمنه ...
اشوف الجبل متحزم من السعف
والاعظميه تجي
باول اذان الفجر
للكاظميه بشغف..
واتكلها ..
ندهي الولد .. بغدادهم فرعت واتريد شيلة شرف ..
ماتحمل ام الخدر تكضي عمرها سبي
وابليلها تختنك
***

اتمنه ..
اطب مندلي ..
واكعد ابديرة هلي ...
واطبعلي بوسة عشك ..
وحده اعله وجنة عمر ..
و وحده اعله وجنة علي ..
والكه الرمادي حضن ..
مامرة طور الحزن ..
وابرقته ينفتح
وايلـّوح اعله النجف ..
***

اتمنه..
امشي بوطن ..
مابيه اثر للجرح ..
وبكل ..
محله اطب والكه الفرح مزدحم
مابين حنه وعرس ..
وبغيمة العاطفه
الكه المحنه مطر ..
ونجوم زركه وكمر ..
وطيور فوك الشجر ..
ماتنحكم بالحبس ..
واتمنه ...
اطب البلد ..
وما اشوف اكو مشكله ..
و بالرطبه ازورن علي
وابنينوى كربله ..
والشطرة..
من تختنك
تشتم عبير الدبس
الله ياموطني ..
ميزات الك هالكثر
عد الدول تندرس ..
مايك دوه لكل جرح ..
شمسك ضوة لكل شمس ..
كاعك نظيرة عدن..
سحرك دوه لكل نفس
طينك ذهب من ذهب
و ما يسوى غيرك فلس
مايسوى غيرك فلس
*************
هذه القصيدة هي للشاعر الدكتور فلاح الزيدي

الف شكر يا سومري

يسلمووووووووووووووووووووووووووووووووووووووو

عاشت الايادي